ບັນດາຜູ້ນຳປະເທດອາຫຣັບ ກ່າວວ່າ ການໂຈມຕີທາງອາກາດ
ພາຍໃຕ້ການນຳພາຂອງ Saudi Arabia ຈະດຳເນີນສືບຕໍ່ໄປ
ຈົນເວລາໃດ ພວກກະບົດ Houthi ທີ່ໄດ້ຮັບການໜຸນຫຼັງຈາກ
ອີຣ່ານ ຖອນອອກໄປຈາກດິນແດນທີ່ພວກເຂົາໄດ້ຍຶດເອົາ ແລະ
ຍອມຈຳນົນ.
ບັນດາຜູ້ນຳເຫຼົ່ານີ້ ໄດ້ມີຄຳຖະແຫຼງດັ່ງກ່າວ ໃນເວລາອັດກອງ
ປະຊຸມສຸດຍອດຂອງສັນນິບາດຊາດອາຫຣັບ ທີ່ເມືອງ Sharm
-el-Sheik ຂອງອີຈິບ ໃນວັນອາທິດມື້ນີ້.
ໃນການຖະແຫຼງຕໍ່ກອງປະຊຸມໃນວັນເສົາວານນີ້ ປະທານາທິບໍດີ Abd-Rabbu Mansour Hadi ແຫ່ງເຢເມັນ ໄດ້ປະນາມພວກShi’ites ທີ່ຕໍ່ຕ້ານທ່ານ ຊຶ່ງສ່ວນຫຼາຍເປັນສະມາຊິກຂອງກຸ່ມຊົນເຜົ່າ Houthi ໃນເຢເມັນວ່າ ເປັນ “ຫຸ່ນ” ແລະ “ລູກແຫຼ້ງຕີນມື” ຂອງອີຣ່ານ. ແຕ່ອີຣ່ານຢືນຢັນວ່າ ຕົນບໍ່ໄດ້ໃຫ້ເງິນທຶນ ຫຼືເຝິກແອບພວກກຳລັງ Shi’ite ໃນເຢເມັນນັ້ນ.
ບັນດາຜູ້ນຳໃນກອງປະຊຸມສຸດຍອດ ຍັງໄດ້ຕົກລົງ ທີ່ຈະຈັດຕັ້ງກຳລັງຮ່ວມອາຫຮັບຂຶ້ນ ເພື່ອ
ຮັບມືກັບການຂົ່ມຂູ່ດ້ານຄວາມປອດໄພທີ່ກຳລັງເພີ້ມທະວີຂຶ້ນເລື້ອຍໆໃນພາກພື້ນນັ້ນ.
ຄາດວ່າ ການເຮັດລາຍລະອຽດ ກ່ຽວກັບອົງປະກອບ ແລະໂຄງຮ່າງຂອງກອງກຳລັງຮ່ວມ
ດັ່ງກ່າວຂຶ້ນ ຈະໃຊ້ເວລາຫຼາຍເດືອນ.
ໃນຂະນະດຽວກັນ ຝູງເຮືອບິນລົບ ພາຍໃຕ້ການນຳພາຂອງ Saudi Arabia ກໍໄດ້ສືບຕໍ່
ໂຈມຕີເປົ້າໝາຍຕ່າງໆໃນພາກໃຕ້ຂອງເຢເມັນ ເປັນມື້ທີສີ່ລຽນຕິດ ໃນວັນອາທິດມື້ນີ້.
ກຸ່ມປະສົມອາຫຣັບ ກ່າວວ່າ ບັດນີ້ ຕົນໄດ້ຄວບຄຸມທາງອາກາດທັງໝົດໃນເຂດນ່ານຟ້າ
ຂອງເຢເມັນ ຫຼັງຈາກທຳລາຍພວກລູກສອນໄຟຕໍ່ຕ້ານອາກາດສະຍານຈາກພາກພື້ນ
ດິນຂອງກຸ່ມ Houthi ເກືອບທັງໝົດແລ້ວໃນຄັງອາວຸດໃນເຂດອ້ອມແອ້ມເມືອງ Aden
ແລະນະຄອນຫຼວງ Sana’a ນັ້ນ. ລາຍງານຂ່າວຈາກເມືອງ Aden ເອງໃນວັນເສົາວານ
ນີ້ ກ່າວເຖິງສະພາວະວຸ້ນວາຍແລະສັບສົນທາງພາກພື້ນດິນ ໂດຍມີພວກລັກຂະໂມຍປຸ້ນ
ສະດົມເອົາສິ່ງຂອງໃນສະຖານທີ່ແຫ່ງຕ່າງໆຂອງລັດຖະບານ ແລະພວກທະຫານຂອງ
ເຢເມັນໄດ້ຫັນປ່ຽນຄວາມຈົງຮັກພັກດີຂອງພວກເຂົາເຈົ້າ ໄປຍັງຝ່າຍກະບົດ.
ໃນວັນເສົາວານນີ້ເຊັ່ນກັນ ບັນດານັກການທູດນາໆຊາດ ແລະພວກເຈົ້າໜ້າທີ່ສະຫະປະ
ຊາຊາດ ໄດ້ພາກັນຫຼົບໜີຈາກເມືອງ Aden ເມືອງໃຫຍ່ທິ່ສຳຄັນໃນພາກໃຕ້ຂອງເຢເມັນ
ທີ່ເປັນຈຸດຂອງການສູ້ລົບກັນໃນເວລານີ້.