ກຳລັງຮັກສາຄວາມປອດໄພປາກິສຖານ ໄດ້ກວາດລ້າງພວກປະ
ທ້ວງຕໍ່ຕ້ານລັດຖະບານຫຼາຍຮ້ອຍຄົນ ອອກຈາກສະຖານີໂທລະ
ພາບແຫ່ງຊາດແລ້ວ ຫຼັງຈາກພວກປະທ້ວງເຂົ້າຍຶດເອົາອາຄານ
ແລະຕັດການຖ່າຍທອດຂອງສະຖານີດັ່ງກ່າວ.
ພວກປະທ້ວງທີ່ຮຽກຮ້ອງໃຫ້ນາຍົກລັດຖະມົນຕີ Nawaz Sharif
ລາອອກຈາກຕຳແໜ່ງ ໄດ້ບຸກເຂົ້າໄປສະຖານີໂທລະພາບປາກິສ
ຖານ ຫຼື PTV ໃນວັນຈັນມື້ນີ້. ສະຖານີດັ່ງກ່າວໄດ້ຖ່າຍທອດສົດ
ພາບພວກປະທ້ວງຢູ່ໃນຫ້ອງການຂອງຕົນທີ່ນະຄອນຫຼວງອິສລາ
ມາບັດ ໃນວັນຈັນມື້ນີ້.
ກ່ອນໜ້ານັ້ນ ພວກປະທ້ວງທີ່ຖືໄມ້ຄ້ອນແລະກ້ອນຫິນ ໄດ້ປະທະກັນຄັ້ງໃໝ່ກັບຕຳຫຼວດ.
ພວກປະທ້ວງໄດ້ທຳການປະທ້ວງມາເປັນເວລາຫຼາຍສັບປະດາແລ້ວ ຮຽກຮ້ອງໃຫ້ນາ
ຍົກລັດຖະມົນຕີ Nawaz Sharif ລາອອກຈາກຕຳແໜ່ງ.
ເຖິງແມ່ນຝົນຕົກໜັກ ພວກປະທ້ວງກໍໄດ້ພະຍາຍາມບຸກຜ່ານເຂດປ້ອງກັນຂອງຕຳຫຼວດ
ເຂົ້າໄປຫາບ້ານພັກຂອງນາຍົກລັດຖະມົນຕີໃນນະຄອນຫລວງນັ້ນ ແລະຕຳຫຼວດໄດ້ຕອບ
ໂຕ້ດ້ວຍການຍິງແກສນ້ຳຕາໃສ່.
ການປະທ້ວງ ຢູ່ອິສລາມາບັດ
ທ່ານ Imran Khan ຜູ້ນຳຝ່າຍຄ້ານໃຫ້ຄຳໝັ້ນສັນຍາທີ່ຈະບໍ່ຍົກເລີກການປະທ້ວງຕໍ່ຕ້ານລັດຖະບານ ຈົນກວ່ານາຍົກລັດຖະມົນຕີຈະລາອອກ.
ໃນຄືນວັນອາທິດວານນີ້ ທ່ານ Khan ໄດ້ຮຽກຮ້ອງພວກສະໜັບສະໜຸນທ່ານ ໃຫ້ປະເຊີນ
ໜ້າກັບຕຳຫຼວດ ແລະສະແດງຄວາມເດັດດ່ຽວ ຕ້ານອັນທີ່ທ່ານເອີ້ນວ່າ ການປາບປາມທີ່
ຜິດກົດໝາຍຕໍ່ພວກປະທ້ວງຢ່າງສັນຕິນັ້ນ.
ກອງທັບທີ່ມີອຳນາດຂອງປາກິສຖານ ໄດ້ຮຽກກອງປະຊຸມຂອງບັນດາຜູ້ບັນຊາການສູງສຸດຂອງຕົນ ໃນວັນອາທິດວານນີ້ ຊຶ່ງບໍ່ເຄີຍມີມາກ່ອນ ແລະເວົ້າວ່າ ລັດຖະບານຄວນຈະຍຸດຕິ
ການປະເຊີນໜ້າກັນກັບພວກປະທ້ວງຢ່າງສັນຕິ ໂດຍທັນທີ.
ນາຍພົນ Raheel Sharif ຫົວໜ້າກອງທັບ ເຕືອນວ່າ ການໃຊ້ກຳລັງຕໍ່ໄປອີກ ພຽງແຕ່
ຈະເພີ້ມຄວາມວຸ້ນວາຍຂຶ້ນເທົ່ານັ້ນ.
ພວກປະທ້ວງຫຼາຍພັນຄົນ ໄດ້ພາກັນປຸກເຕ້ນພັກຢູ່ໃນນະຄອນອິສລາມາບັດມາໄດ້ສອງອາທິດປາຍແລ້ວ ຮຽກຮ້ອງໃຫ້ທ່ານ Sharif ລາອອກຈາກຕຳແໜ່ງ. ພວກຝ່າຍຄ້ານກ່າວ
ຫາທ່ານວ່າ ໄດ້ທຳການສໍ້ໂກງຢ່າງຫລວງຫລາຍໃນການເລືອກຕັ້ງໃນປີແລ້ວນີ້. ພວກນັກ
ສັງເກດການນາໆຊາດໄດ້ກ່າວວ່າ ການປ່ອນບັດເລືອກຕັ້ງ ສ່ວນໃຫຍ່ແມ່ນດຳເນີນໄປ
ຢ່າງເສລີ ແລະຍຸຕິທຳ.
